أنا مش موافق على ال 12 ساعة ... مين معايه ؟؟

[color=red]

كثيرين منا يعمل فى القطاع الخاص ما بين 8 ساعات و 12 ساعة
و للعمال و الموظفين فيها الحق فى ساعة راحة فى ال 8 ساعات
و للأمانة لا يأخذ العمال و الموظفين هذه الساعة من الأساس ..
فنجدهم بالكثير يأخذون نصف ساعة . فما بالنا بالذين يشتغلون 12 ساعة

و من المعروف أن الانسان يحتاج من 6 إلى 8 ساعات من النوم يومياً و يفضل 8

فإذا جمعنا 12 ساعة عمل + 8 ساعات نوم .... يصبح المجموع 20 ساعة
أى لن يتبقى للمواطن المصرى غير 4 ساعات فقط
مفترض أن يصلى و يتناول فيها الافطار و العشاء و أن يقوم بكى ملابسه

و معلش هاقلب الكلام للعامية و أقول
و يا سلام بقى لو كان هذا المشتغل بالقطاع الخاص مغترب
و بيحتاج يغسل هدومه أو يشترى طلباته بنفسه و كمان لو بيركب أوتوبيس الشغل
و بياخدله كمان ساعة و لا اتنين رايح جاى على مكان شغله .. يا عينى
أظن مش هايلاقى وقت ياكل و لا يقابل أصحابه و لا حتى يقرأ الجرايد
و لا يتفرج على التليفزيون و يتابع أيه اللى بيحصل فى العالم .

طيب أومال لو هذا العامل أو الموظف اتجوز أو اتجوزت هايقدروا يقعدوا مع بعضهم امتى ؟
و لما يجيى الأطفال ... ميين هايراعيهم فى البيت ...
4 ساعات بس هاتخلينا ناخد بالنا من ولادنا كويس !!!
دول لو فضلوا أصلاً 4 ساعات . !!!
و هاتشوفوا الكلام ده مستقبلاً هايأثر على أسرنا إزاى بالسلب .

و علشان ماحدش يقول حاجة ... ف أنا جربت العمل 8 و 10 ساعات متواصلة
و شوفت يعنى أيه ما يكونش عندك وقت بعد الشغل لعمل أى شيىء .
بره فى اوروبا و أمريكا بياخدوا يومين أجازة فى الأسبوع
و احنا عندنا والله مصانع بتشتغل حتى يوم الجمعة و ما بتديش أجازات أسبوعية .

بجد نحن أمام مأساة اسمها العمل 12 ساعة

واحد يطلع عليه و يقولى دلوقتى : ياعم .. هوه احنا أصلاً لاقيين شغل
لما هانتشرط ما نشتغلش غير 8 ساعات بس بالكتيير !!!
ماشى بس خد بالك ... لو أنت شغال فى مصنع و على طول واقف هايجيلك مرض
يا اما فى ركبك يا اما دوالى ... و لو شغلك كله قعاد على مكتب هايجيلك مرض برده
يا اما بواسير يا اما سمنة ... فالوقفة الكتيير غلط و القعاد الكتيير غلط
خاصةً لو كان مدته 12 ساعة ... يا رب أكون قدرت أوصل وجهة نظرى .

و بالمقارنة مع المشتغلين بالقطاع العام

نجد أغلبهم يعملون من الساعة 8 ص حتى 2 أو 3 ظهراً
لكن واقعياً و عمليا نجدهم يعملون ساعتين تلاتة على الأكثر
و باقى الوقت ... كلنا عارفين بيروح فين .

يعنى .. يا إما نشتغل 12 ساعة و تتهرى أبدانا و تروح صحتنا و نرجع بيوتنا
مش لاقيين وقت نقضلى فيه مصالحنا و نستمتع فيه بحياتنا .
يا إما ما نشتغلش ساعتين على بعض و نقبض فلوس على أى كلام .

لذلك أنا مش مع ده و لا ده

و من هنا ... من هذا المنتدى الكبير أعلنها صراحة ً
أنا ضد العمل 12 ساعة
و يجب ألا تزيد ساعات العمل عن 8 ساعات يومياً .
نريد من أصحاب الأعمال ألا يستغلوا أوضاعنا الاقتصادية الصعبة
و عدم وجود فرص عمل تكفى البطالة الموجودة باستعبادنا 12 ساعة .
[color:60db=red:60db]
أنا قلت كلمتى .... مين معايه يا مصريين ؟؟

مشكور أخى على اثارة هذا الموضوع
وانا كمان جربت شغل 12 ساعة وفعلا ما كنش عندى وقت اعمل أي حاجة
كنت برجع من الشغل انام واصحى اتغدى وانزل الشغل تانى
بجد فعلا الشغل 12 ساعة مأساة
وبعدين الواحد مننا بيهلك صحته علشان يجيب فلوس وبعد كده يتعب ويصرف الفلوس اللى جابها علشان يتعالج
يبقى من البداية الواحد ما يشتغلش غير الشغلانة المريحة ليه حتى لو كان مرتبها قليل بس هو كده بيكون حافظ على صحته
نرجو من جميع أصحاب العمال ألا يستغلوا العمال وبدل ما يكون المصنع شغال على مرتين 12 ساعة يشتغل على 3 مرات 8 ساعات هو المرتبات صحيح هتزيد شوية بس هتكون حافظت على أسر كثيرة من الضياع