الرئيسيةالتسجيلالتسجيلدخول

شاطر | 
 

 يــومــيــات جــنــدي فــي الــجــيــش

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
KIMOZ
هووكس فعال
هووكس فعال
avatar

ذكر
عدد الرسائل : 481
العمر : 30
تاريخ التسجيل : 27/08/2007

مُساهمةموضوع: يــومــيــات جــنــدي فــي الــجــيــش   الخميس 22 نوفمبر 2007, 1:58 pm

" سيادة الوزير جاي "




" يااااااااه أنا هأقوله على الترقية المتأخرة "
" وأنا هأطلب منه المعدات والسلاح اللي ناقص في الكتيبة بتاعتي "
" وأنا عايز أسأله على البعثة اللي أنا مرشح لها ومحدش عارف البعثة دي مطلعتش ليه لحد دلوقتي "

طلبات كتير جدا اللي ممكن يطلبها الضباط وضباط الصف والجنود من وزير الدفاع والإنتاج الحربي
الكل محضر قايمة طويلة عريضة من الطلبات والاستفسارات علشان يقدموها للوزير – وده لأن الوزير جاي يقعد معانا ويعرف مشاكلنا
أعجبت جدا بالموضوع.
إن يبقى مسئول كبير جدا زي ده بينزل للوحدات البعيدة في السلوم بنفسه علشان يتعرف على مشاكلها
وجهزنا نفسنا وطبعا مش هأقولكم عن النظافة ولا الأشجار والأعلام والي خلينا تزين الوحدة (بجد الوحدة كانت جميلة جدا)
والضباط كمان جهزوا نفسهم وجهزوا وحداتهم الفرعية – السرايا والكتائب – والأسلحة وكل حاجة بقيت 100 فل وعشرة
وجيه اليوم الموعود


كل صحى من النوم الساعة 5 الفجر
وبيلبس أفرول نظيف ويلمع البيادة
ونزلنا أرض الطابور علشان نصطف إحتفالا بزيارة الوزير
قائد اللواء :
" النهاردة زي ما أنتم عارفين سيادة الوزير هايشرفنا بالزيارة – علشان كده انا مش عايز حد منكم يظهر النهاردة في الوحدة ......... كل يدخل المبيت بتاعه وما يطلعش منه لحد ما الوزير يمشي "
زهلت من الكلام ده أزاي يعني
أمال الوزير هايجي يقابل مين وهايجتمع مع مين
وإتحبسنا في المبيتات بتاعتنا فعلا
ولان فيه ناس مظلومة قوي وكانت عايزة تشكي مظالمها لسيادته
طلعت بره المبيتات وهنا جيه دورنا دور عساكر الامن
ورحنا ندخل الناس في المبيتات بتاعتها
وأول ما قرب سيادة الوزير من الوحدة – جيه بطائرة بتاعته – جيرنا نستخبى علشان ما يشوفناش
وفوجئت بمجموعة عساكر وضباط أول مرة أشوفهم في الوحدة واقفين إصطفاف قدامه وبيرحبوا بيه
معاهم قادة الكتائب بتوعنا بس العساكر وضباط الصف والضباط مش هما
ناس تانية ودخلوا ميس الطعام بعد جولة تفقدية للمكاتب القادة اللي طبعا مجهزة تجهيز تام – ومحدش عبر مبيت واحد من بتوع العساكر
أنا كنت في الميس – وطبعا لاقيتهم جايين عليا – دخلت إستخبيت في مخزن الأكل وطلعت على شوال بصل وقعدت أبص من شراعة على اللي بيحصل.
وفي ميس الطعام جيت كلمة السيد الوزير :
" أبنائي وأخواني السادة الضباط وضباط الصف والجنود ...... رجال القوات المسلحة المصرية ......... أبطال مصر وحماة بوابتها الغربية ........ جئت اليوم إليكم لنعزز روح الأسرة الواحدة كما كنا دائما ....... وكما سنكون دائما إن شاء الله .
أبنائي وأخواني السادة الضباط وضباط الصف والجنود ....... حضوري اليوم لكم هو للتواصل بين القيادة وبين الوحدات الفرعية لتنظيم العمل وإزلال جميع الصعوبات وحل المشاكل ........ بناء على تعليمات سياة الرئيس / محمد حسي مبارك ( القائد الأعلى للقوات المسلحة ) الذي يرعى أبناءه إينما كانوا .............. إلخ "
كلام كتير وجميل وإتقال قبل كده 10 ألاف مرة
وطبعا إتكلم بعده قائد اللواء وطبعا كان طبيعي إنه يرحب بسيادته وبـ القائد الأعلى للقوات المسلحة
اللي مكنش موجود معانا بس طبعا حسه في الدنيا
وجيه وقت المشاكل والتعارف عليها
الحمد لله فيه ناس رفعت إيدها بتطلب الكلمة
" جندي مجند مش عارف أيه كده .......... إحنا يا أفندم بنتشرف بإنضمامنا للقوات المسلحة المصرية ...... وبنشكر سيادتك على كل الخدمات اللي سيادة القائد الأعلى للقوات المسلحة وطبعا حضرتك موفرينها لينا ...... ومع إننا في منطقة صحراوية لكن متاح لينا كل الخدمات "
واحد تاني ربنا ينفخ في صورته ويوصل كلمة واحده بس من الحقيقة اللي بنعيشها
" رقيب أول فلان بن علان ............. إحنا حضرتك عندنا مشلكة هنا ..... سيادتك القطار اللي بننزل فيه إجازة مفيهوش غير 3 عربيات بس مكيفة ...... وإحنا بنطلب من سيادتك إن القطار كله يكون مكيف "
أيه ؟
القطار ده مفيهوش ولا عربية مكيفة ده حتى مفيهوش ولا شباك
أيه الطلبات دي
واحد كمان رفع أيده - ده الواد فريد اللي ساكن في شارعنا – وفرحت إني لاقيت حد أعرفه وسط الناس الغريبة دي
" ملازم فريد أي حاجة ........... كنا عايزين حضرتك زيادة معدل الدورات التدريبية لفصيلة الإشارة "
مين ؟ وهي فين دي فصيلة الإشارة ........... هما أصلا بياخدوا الدورات الأساسية علشان ياخدوا دورات تانية
خلص اللقاء على خير ومشي الوزير وهو مبسوط وانا أخدت افراج من شوال البصل بعد 4 ساعات كاملة
" فرييييييييييييييييد ............ أنت بتعمل أيه هنا ؟ "
" يوسف ..... أزيك يا واد عامل أيه ؟ "
" انا كويس الحمد لله المهم أنت بتعمل أيه هنا وعامل فيها ضابط كمان "
" لا أبدا أنا في المخابرات الحربية ..... كل شغلتي إن لما الوزير يروح حته ... بنكون إحنا في إستقباله علشان نرسم الدنيا الواردي قدامه سيادته "
" والناس اللي معاك دول ....... وأيه اللي خلاك ضابط "
" يابني أفهم مش مهم تبقى أيه ...... ضابط دي علشان أنا طويل وشكلي حلو فالمفروض أني من الناس اللي بقعد قدام ..... عادي يابني "
" عاااااااااااااااااااااادي ...... بتضحكوا على الوزير وتقولي عادي "
" نضحكوا عليه أيه يا بني متوديناش في داهية ....... الوزير علشان تبقى عارف هو عارفنا كلنا وبنتعرض عليه قبل ما نقوم بالمهمة دي ........ ده حافظ معظم الأسامي بتاعتنا "
" طبعا لازم يحفظها ....... مش بيقابلكم كل يوم علشان تقولوا على القطر المكيف والدورات التدريبية وسايبين المشاكل الحقيقية والعساكر اللي بتتظلم وحتى الضباط اللي عندهم نقص في المعدات والسلاح والإجراءات الروتينية معطلها ....... يا بني المشاكل ياما والواحد لما عرف إن الوزير جاي قال أنه خلاص كل مشاكله هاتتحل "
" يوسف ........... أوعى تكون فاكر أني ليا ذنب ...... أنا مجند زي زيك ........ وزي ما أنت أخدت أمر أنك ماتظهرش قدام الوزير أنا كمان عندي أوامر أني أكون مع الوزير على طول "
" أنا عارف أنك ملكش ذنب يا فريد .... بس الناس اللي كان عندها أمل في أن مشاكلها تتحل دي ذنبها أيه ؟ "

زمان كانوا بيجيبوا الزرع والإشجار واللبس النظيف علشان زيارة معالي الوزير
دلوقتي كمان بيجيبوا بني أدميين جداد علشان الوزير




وتعلمت الدرس الاول من الجيش :
هات ناس جديد × جديد ..... يبقى الوزير فرحااااااااان وسعيد




الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://WWW.FOUR.HOOXS.COM
KIMOZ
هووكس فعال
هووكس فعال
avatar

ذكر
عدد الرسائل : 481
العمر : 30
تاريخ التسجيل : 27/08/2007

مُساهمةموضوع: رد: يــومــيــات جــنــدي فــي الــجــيــش   الخميس 22 نوفمبر 2007, 2:02 pm

يوميات جندي في الجيش ■ الجزء الثاني ■




أخيرا خلصت فترة التدريب وهأروح وحدتي الأساسية

مشوار طويل وصعب لمدة 12 يوم لا عارفين نشرب ولا ناكل ولا ننام ولا أي حاجة



لكن كنا بنتصرف

الجيش علمنا أننا نتصرف في أي موقف

وكنت أنا مبسوط جدا بأني بأخدم وطني وبالجو العام المحيط بيا , وكانوا زميلي بيبصوا لي على أني مجنون جاي من كوكب تاني علشان مبسوط في أداء الخدمة العسكرية

وصلت السلوم



صحراء جرداء لا زرع فيها ولا ماء

هو ده الكلام

كنت مبسوط جدا بوحدتي الأساسية , أنا اتحرمت من الرماية والتدريب على المدفع بتاعي طوال فترة مركز التدريب

لكن دلوقتي هأعوض كل اللي فاتني وهابقى زي (أدهم صبري ) بعرف أستخدم كل انواع الاسلحة

جندي مجند " .... .... ...."

أفنــــــــــــــــــــــــــــدم

" أنت بتعرف كمبيوتر ........ مش كده ؟ "

ترددت في الأجابة ........ لأني كنت اعرف مخزى السؤال .... ولكني أريد أن أحمل سلاحي وأتتدرب عليه وإلا تتضيع فترة خدمتي بوحدتي الأساسية كما ضاعت فترة تتدريبي في مركز التدريب

يالله بقى ما باليد حيلة

" أيوة يا أفندم أنا بعرف كمبيوتر "

" أعملوله جواب على مفرزة أمن اللواء ........... وأديله كل الشغل اللي المفروض يخلص قبل التفتيش "

مفرزة الامن اللواء

اللي بيسمع الأسم لأول مرة ممكن ميعرفش يعني أيه (زي ما أنا سمعته أول مرة )

أمن اللواء بيكون زي البوليس في الحياة العادية

مجموعة عساكر بيقودها ضابط برتبة (نقيب ) أسمه (... ... ... ) مسؤولة عن الأجازات والسلاح ومفاتيح المخازن والإنضباط العسكري (يعني من الأخر من حقهم يتنططوا على أي حد حتى لو أعلى منهم رتبة أو أقدمية



التفتيش خلص الحمد لله

ونجحت في أول إختبار ليا وخلصت شغل كتير جدا في وقت قياسي وده خلاني وبعد مرور شهرين بس

عريف / ... ... ...

الترقية دي كانت مهمة قوي بالنسبة لي .......... لكن الأهم هي الشهرة الواسعة اللي أخدتها بين القادة والضباط وزملائي .

وبقيت حكمدار مفرزة الأمن كمان .



يوم الخميس الساعة 1:30 باليل

مكنش جايلي نوم

وطلعت أقعد مع زملائي النوبتجية الليلي

قاعدين بنضحك وبنهزر والدنيا ربيع والجو بديع

بوم بوم بوم بوم بوم

منين ضرب النار ده مع ان السلاح اللي مع عساكر الخدمة سلاح مش بيكون فيه ذخيرة ....... بيكون عياقة بس

ضرب نار وناس بتصرخ وبتقول (ألحقونا .......... حرس سلاح )

جرينا وأحنا مش عارفين نعمل أيه

ده صوت زميلنا اللي وقفين خدمة على وقود العربيات والدبابات

جرينا عليهم وأحنا ماسكين طوب في أيدينا ( والله طوب )

وصلنا لهم

لكن بعد فوات الأوان

3 شباب في العشرينات من عمرهم

مضروبين بالنار ومسروقة أسلحتهم الميري

أترموا على الأرض ودمائهم الطاهرة بتغرق أجسامهم وبتفيض منها أنهار بتروي الأرض وبيجري الدم في خط معوج زي ما يكون تعبان أحمر بيجري من جسم الشهيد



" بدو السلوم طلعوا عليهم وقتلوهم , علشان يسرقوا سلاحهم "

" ايوة ما دي مش أول حادثة من نوعها يعني "

" طب المفروض الخدمة تقف بذخيرة حية علشان يحافظوا على ارواحهم "

" ما هو المفروض أنهم واقفين بذخيرة حية ....... لكن القائد مانعها عنهم بطريقة غير رسمية يعني علشان الحواذث الخطأ "

" طب يعني هما هايصرفوا تعويضات للعساكر دي أد أيه ؟ "

" لو الحكاية وصلت للمحكمة العسكرية زي ما هي كده ........... القائد بتاعنا هايتسجن فيها ويتعزل من رتبته "

طبعا مكنش فيه كلام غير عن الموضوع ده والدعاء لزملائنا الشهداء

ولأني كنت من أول الموجودين في مكان الحادث فأني كنت متوقع حضوري للشهادة في المحاكمة العسكرية

لكن المحاكمة العسكرية أنعقدت وأصدرت الحكم من غير شهود وكان حكمها غريب جدا

حكمت بالإعدام على ( ... و ... ) رميا بارصاص (اللي هما ماتوا أصلا ) وذلك لأهمالهم في تأدية الخدمة العسكر وعدم إطاعة الأوامر العسكرية المستديمة وحاجات كتير كده تخليهم مجرمين حرب ( وكل ده على أساس أنهم كانوا نايمين في الخدمة ) وكمان حرموهم من مكافأة القوات المسلحة

وكان تنفيذ حكم الإعدام غريب قوي

3 أفرولات (بدل مموه من بتوع العساكر ) متعلقين على 3 خشبات

وأنضرب عليهم نار

على الأفرولات الفارغة

على اصدقائنا الشهداء

وقعت على الأرض وأنا أجهش بالبكاء

أنا متأكد أن زملائي ماتوا لأن مكنش معاهم حاجة يدافعوا بيها عن أنفسهم ضد نار قاتلهم

هما كانوا بيصرخوا قبل ما يموتوا

يعني كانوا صاحيين وشايفين القتلة وهما بيقربوا منهم

يعني المحكمة العسكرية جاملت القائد بتاعنا على أساس ( الحي أولى من الميت )

3 شباب في العشرينات من عمرهم ماتوا مقابل أنا عقيد يحتفظ بوظيفته

ومع إحتفاظه بوظيفته

متهيألي الشهداء هايكونوا أكتر

وأتعلمت الدرس الثانى ليا في الجيش :



الضرب في الميت ....... مش حرام

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://WWW.FOUR.HOOXS.COM
DVDrip
هووكس جديد
هووكس جديد
avatar

ذكر
عدد الرسائل : 86
تاريخ التسجيل : 18/08/2007

مُساهمةموضوع: رد: يــومــيــات جــنــدي فــي الــجــيــش   الثلاثاء 04 ديسمبر 2007, 4:47 am

ههههههههههههههههههههههههههههههههههههه
وين يا وين
الوزير جاى
بس على فكرة الموضوع مهروش
انا هرشه
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
lolaa
مشرفة منتديات الاسرة والمجتمع
مشرفة منتديات الاسرة والمجتمع
avatar

انثى
عدد الرسائل : 251
العمر : 33
تاريخ التسجيل : 24/06/2007

مُساهمةموضوع: رد: يــومــيــات جــنــدي فــي الــجــيــش   الأحد 30 ديسمبر 2007, 7:34 am

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://thuglove.msnyou.com/
 
يــومــيــات جــنــدي فــي الــجــيــش
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
الفور هووكس :: الهووكس {الاول} :: منتديات الموضوعات العامة :: الموضوعات العامة-
انتقل الى: