الاول ياجماعة الموضوع منقول
أخوتي الاحباب أعضاء قسمي المفضل ورابطتي الي بحبها جدا من كل قلبي .....
بتحصل للواحد بلاوي وحاجات كتير في الغربة
... ومعلش انا هنا هخليها على البساطة البساطة بدون لغة عربية فصحى ولا بتنجان .... خلينا كدا ايه حلوين ومنعنشين وواخدينها على البساطة ....
فكرت اني اسجل اليوميات دي في موضوع متجدد باذن الله ....
معرفش هتستفيدوا منها ازاي بس الواحد بطبيعة الحال بيحط نية للعمل عشان ربنا يحطة في ميزان حسناته .... ونيتي هنا اني افيد كل من يريد ان يستفيد ....
أخوكم أعزب والغربة للأعزب تختلف تماما عن الغربة للي متجوز ومعاه أسرته وعياله
... أو حتى معاه العصفورة الي بتشاركه حياته من غير عيال
كونك بتحس انك وحيد من غير حد يسأل عليك ولما تعيط يمسح دمعتك ولما تضحك يضحك معاك ولما تتعب يجري ويحاول يساعدك ويقلق عليك ... فدا احساس بشع ....
المهم عشان منطولش عليكم نخش في يومنا الاول ( الفلوس هنعتبرها بالجنيه عشان محدش يعرف انا فين )
:
يوم الاربعاء 19 سبتمبر 2007 :طبعا انتم عارفين اني مهندس اتصالات وباعمل في توكيل لشركة هولندية متخصصه في هذا المجال وطبعا الشركات في دول الخليج غالبا ما بتتكون من تمنين في المئة هنود بمختلف انواعهم ( وهم انواع كثير قوي على فكرة
) وعشرة في المئة فلبينيات ( وخلي بالك من الاف والتاء دي ) والباقي خلطبيطه مابين العرب واصحاب البلد والجنسيات التانية .....
دي مقدمة عشان تبقوا معايا في الصورة ....
أخواتي وحبايبي صحيت النهاردة متأخر على الساعة السابعة صباحا لأني نمت متأخر امبارح يدوب كدا على الساعة حداشر ... يعني متأخر جدا .... وطبعا مفيش اي امل اني ءاخد اتوبيس لأني مش هلاقيه وان لاقيته يبقى باذن واحد احد هوصل الشغل على تاني يوم متأخر .... فانتحرت وركبت تاكسي .... وطبعا زي مكل الناس عارفه ان التاكسي منسفة للمال مهلكة للمحفظة مذبحة للمرتب .... ولكن شر لا بد منه فركبت وقولنا استعنا بالله ....
بعد ما ركبت ودخلت في التكييييف المريييح بعد عرق ورطوبة
وقلت سلام عليكم والسواق الاسمراني قالي عليكم السلام .. بصيت للسواق عشان اعرف هو هندي ولا عربي ولا اييييه ... عشان احدد ايه اللغة الي هتكلم بيها .. لقيته راجل اسمراني جايب على سوداني بس مش شكله هندي خاااااالص ....
فقلت نتكلم عنجليزي ومن طريقته في الرد هنفهم هو جنسه ايه دا .... انس ولا جن .....
رد عليا عنجليزي برضه بس لهجة غريبة مسمعتهاش قبل كدا ... بس المهم عشان الوقت قلتله وديني الحتة الفلانية .... لقيته رد عليا وقالي حضرتك تعرف فين الحتة دي أحسن انا جديد في البلد ومعرفش فيها حاجة ....
ابتسمت وفرحت ... وفي عقلي قلتله انت لقطه .... عارفين ليه ....ههههه
عشان هخده من اقصر الطرق وافضاها عشان العداد ميحسبش فلوس كثييييير ....
وخدت البشمهندس طالع نازل يمين شمال ووصلت المكتب في عشر دقائق وبأقل مقدار مالي ممكن ....
وقلتله سلامات تخش يمين في شمال عشان تطلع من هنا ... والراجل طلع ..بس الحمد لله مسمعتش صوت فرقعة ولا خبط دليل انه طلع سليم والحمد لله .....
السواق دا طلع اثيوبي وكان بقاله اربع ايام واخد الرخصة ... يعني كان لسه جديد لانج .....
ووصلت الشغل بدري كمان ..... وقعدت قبل الدوام اقرأ المشاركات والمواضيع في رابطتنا الفلة دي ....
ومفيش جديد في اليوم لحد الان وسلامات بقى ليوم جديد بموقف جديده وأخوكم الاعزب في الغربة وبيحب مصر